Wilamowianin - Wymysiöejer

wymysojer

Chciałbym tu napisac wszystkie przedwojenne piosenki wilamowskie razem (ewentualne braki z biegiem czasu uzupełnię):

1. An śrejt weter
An śrejt weter, an śrejt weter
Yt błajwer śtejn
An śrejt weter, an śrejt weter
Yt kynwer gejn
Yt moch a rod, zu post yns grod
Yt moch a rod, zu post yns grod

2. Błi, och błi

Błi, och błi maj zumerwajs
Maj siacła ej mir wakgyrajst
Ejs ej gyrajst yn wajta wag
Ych wa siun nymer łöstig zajn

Ych ho gygryn, ych wa ny gryn
Ych ho gygryn, ych wa ny gryn
Ych wa siun nymer łöstik
3. cwysia ustyn

Cwysia Ustyn, cwysia Fyngsta
Zajn dy makia ower siynsta
Cwysia Ustyn, cwysia Fyngsta
Zajn dy makia ower siynsta
4. Der ołdy Kesuł

Der ołdy Kesuł hot zich byzöfa
Yns uwatiyla wiöe ja gykrocha
Der cypuł wiöe jum byłuma
Ym a sioduł s’wiöe ja kuma
Ej wajnochta, wajnochta

Wos wa wir mocha myt dan cwej boüchiykia
Di gejn y łoüta ołys oüsfrasa
Frasa ufa siofła kötułn
Ufa bonk mytum łöś rytułn
Ej wajnochta, wajnochta

Nöch wa wir ju gejn cym Mözłer Stacha
Diöt wa wir rynsiun ny łön oüsłacha
Diöt zajn brötwiyśt ym küminła
Uferśtuw a kiöb fuł twagla
Ej wajnochta, wajnochta

5. Der ołdy Kesuł II
Der ołdy Kesuł hot zich byzöfa
Cym Hala-mockja un dy śtiyla gykrocha
Dos wiöe ju a zyter kaluś
Dor wułd śłöfa mytum Haluś
Underum bejnła
6. Diöt fum hejwuł

Diöt fum hejwuł kymt maj Jasiu siun gyryta, ryta
Ejwer ynzer śweła, kliny hojzła tryta, tryta
Ych fum frajt śpryng ych rojz, śpryng ych rojz, śpryng ych rojz
Łö dich siun fu mir ny rojz, łö dich siun ny rojz

7. Herct mer ny
8. Kuzie makia

Kuzie makia, kuzie makia
Dü cy mir, dü cy mir
Ych wył kuza, ych wył kuza
Ych myt dir, ych myt dir

Ynzer müter, ynzer müter
Zoch yns cü, zoch yns cü
Wi wer hüta, wi wer hüta
Ynzer siejny ruty kü

9. Kynder makia

Kynder makia s’kynd wył koko
S’höt siun draj möł bums gymocht
Kynder makia breng a lopa
An s’wyś kynd a hyndyn o

10. Maj Jasiu, maj Jasiu
11. Maj makia

Maj makia ku cy mir
Ych wył kuza myt dir
Wir wan yns siejn pösa
Dy müter wyt ny wysa

12. Makia maj

Makia maj, łö mich naj
Łö mich myt der śłöfa
S’kon ny zajn, s’wyt ny zajn
Dy müter wie mich śtröfa

Möndła siajnt, s’wiyft an siajn
S’rumpułn undyn brykia
Ych gydöcht, ych gydöcht
Maj Jasiu kymt gyryta

S’möndła łocht, ych ym stroch
Fun mer cy atkłojfa
Dy müter jöet mich mytum śtrong
Zy kon mich ny derłojfa

13. Ny siyk mich

Ny siyk mich ys pyśła naj
Biöemła feła wył ych ny
S’biöemła wie mich ju derśłön
Wos wie nöcht maj makia ziöen.

14. O maj łiwy müter

O maj łiwy müter
s’trojmt mer hojty dor nocht
Do dy büwa köma
Grod yr hołwa nocht
Ufs fonster dö pöchta zy
An śłöfa łisa zy ny.

15. Poter, foter
Poter, foter ej gykuma cym kolendowan
An yns oła s’gyłyk wynsia ana yns cyzan
Łong zu łowa ynzer fiöer, ynzer wiyt, ynzer poter, ynzer kiyt

16. Rajta, rajta, rajta

Rajta, rajta, rajta
Siowułn uf dy cajta
Jungy makia grisa
Ołdy bowa sisa

17. S’wiöe amöł

S’wiöe amöł ym wynter kołd
Nom a okys ging yn wold

Y dom wold wiöe gruser śnej
Y dom gotła błi der kłej

Wyłat dü makia frajyn hon
Gej y kracium konst a hon

Ufum biöelgia kryt der hoon
Y dam betła śłöf maj mon

Ana drüżkiyn, ana broüt
An cwe hiöetła grinys kroüt

18. S’wün amöł cwü mykia

s'wün amöł cwu mykia
Ufum kiyhüf fłykia
s'hot mi wunder, eiwerwunder wi dy mykia fłykia

s'wün amöł cwej hoza
Ufum kiyhüf groza
s'hot mi wunder, eiwerwunder wi dy hoza groza

s'wün amöł cwe fłigia
Ufum kiyhüf wigia
s'hot mi wunder, eiwerwunder wi dy fłigia wigia

s'wün amöł cwu ojła
Ufum kiyhüf hojła
s'hot mi wunder, eiwerwunder wi dy ojła hojła

s'wün amöł cwu koca
Ufum kiyhüf kroca
s'hot mi wunder, eiwerwunder wi dy koca kroca
19. Śłöf maj kyndła fest

Śłöf maj kyndła fest!
S'kuma fremdy gest
S'kuma müma, ana fetyn
Brengia kyndła nysła, epułn
Śłöf maj skyndła fest!
S’kuma fremdy gest

Śłöf maj kyndła, śłöf
S'wad ym gatła a siöf
Ojyś myt fir wajsa fisła
Brengia kyndła epułn, nysła
Śłöf maj kyndła, śłöf
S'wad ym gatła a siöf

20. Śpacer polka

Śpacer polka siejner tonc
War an ny kon mytśpryngia
Dar zuł zyca ufum bankla
An ym wynkl mytzyngia

21. Trajwer aj, trajwer aj

Trajwer aj, trajwer aj
A wor höt gyhasa
Müter maj, müter maj
Wos hoter ogukocht?

Fłigia braj, fłigia braj
A war wyt dos asa?
Kiytła maj, kiytła maj
No dü müst dos asa

22. Wi der łiwsty Jezus
23. Wi wer gingia uf dy fröed

Wi wer gingia uf dy fröed
Kojftwer yns an goła płoc
Tonct der Jaśki an der Maćki
An der ołdy Pełca Moc

Draj a hynder ana fir
Ho a hytła uny tiir
Ych wył asa, hot ny fejł
Ho a łefuł uny śtejł

24. Wir wan oüch a łöstig łid zyngia
25. Wu gejter gyfoter

Wu gejter gyfoter mytum kiöb ajyn?
Wu gejter gyfoter mytum kiob ajyn?
Ufa jömyt maj gyfoter, ufa jömyt maj gyfoter, ufa jömyt maj gyfoter mytum kiöb ajyn
26. Wu ynzyn rajchia faldyn

Wu ynzyn rajchia faldyn,
Wu der Göt höt gygon
Breng wir oüch hojty giöewa
Nör siun ferenda on

An grina kronc fu ejen
Was, hower ana kön
An błimła fuły śtyjen
Wy ynzyn wejza wün

An grusa kronc fu ejen
Wir bunda mytam bond
Breng wir jüch hojt dos brutła
Fis goncy pöner łond

Wajł ynzer kłopa ata
Ej ju ym łond ka nut
Wos ej fum Göt gybata
Fołt ju ym łond ka brut

27. Wymysiöejer siejny makia

Wymysiöejer siejny makia
zy kyna zich ju siejn brata
Y dy kiych gejn zy siejn ogycün
Ym kracium śtejn zy int byfür

Dy pobütkia müsa glonca
Do zy beser kyna tonca
S'möella mü ju zajn gyśłosa
Do zy beser kyna pösa

Yn gyśtatła siejny ruza
Do zy beser kyna kuza
Ufum hocła zyłwer krojcła
Do zy s’giełd hon śtejn ym mocła

Mytum drüźba kümt a hynder
Bo wer tonca wi der siynder
Kumt mer a drüźba bysienkia
Do wer yns kyna bydenkia

28. Ych kont amöł a makia siejn
29. Ych müs maj drüźba bysienkia

Ych müs maj drüżba bysienkia
Hor kon zich mir ny bydenkia
Hor höt zich zu byzöfa kon ny tonca

30. Yta, yta kymta

Yta, yta kymta
Mytum śnojca dryta
Wen a wył cy makia gejn
Mü ja mytum śnojca dryn

31. zagia moc

Zagia Moc
Bejk an płoc
Gej cym Głücha
Śtył an kücha
S’ej ka moł
S’ej ny nist
Ku cy noma
32. Zajt gybata
33. Zisty s’hada kymta
Zisty s’hada kymta
Łongy siöta nymta
Zisty s’hado kymta siun
Der prefliksty świgierzun